Umuyobozi Mukuru wa Polisi y’u Rwanda CG Felix Namuhoranye, ari kumwe n’Umunyamabanga Mukuru w’urwego rw’igihugu rw’ubugenzacyaha RIB, Col (Rtd) Pacifique K. Kabanda, na Ambasaderi w’u Rwanda muri Singapore, Nyakubahwa Innocent Muhizi, bagiranye ibiganiro n’Umuyobozi wa Polisi ya Singapore, How Kwang Hwee.
Ibiganiro byibanze ku gushimangira ubufatanye hagati yimpande zombi, guteza imbere ikoreshwa ry’ikoranabuhanga mu gipolisi no guhangana n’ibyaha bigenda bivuka. Intumwa z’u Rwanda zizanitabira inama iteganyijwe yiswe milipol techx summit 2026 , igamije kurebera hamwe uburyo bwo guteza imbere ubutwererane mpuzamahanga mu bijyanye n’umutekano binyuze mu guhanga udushya mu ikoranabuhanga rigezweho.
Iyi nama izatanga urubuga rwo gusangira ibitekerezo, kwiga ku bunararibonye bw’ibindi bihugu no kurebera hamwe icyakorwa mu guhangana n’ibyaha birushaho guhindura isura, by’umwihariko mu gihe Isi igenda irushaho kwishingikiriza ku ikoranabuhanga.
U Rwanda rukomeje kugaragaza ko rushyira imbere gukoresha ikoranabuhanga mu guteza imbere umutekano w’abarutuye, no gufatanya n’amahanga mu kubaka Isi itekanye kandi irambye.
